Matante Zélida la ékrir Justin :
Mon shèr nové, mon spès salté !
Moin lé sir, samdi dèrnié, ou la parti Sinpièr. Lé vré, ou i pé pa s’anpas alé pou fèr lintérésan an parmi bann rouj-de-fon kom ou. Oté ! Sérièzman, ou i pans bann gro vaza lavé la, sa i fé in kont sanm ou ? Mi pé pa kroir in n’afèr komsa. Ou la pankor konpri so bann gro mésié i pran bann ti-kolon pou sak zot i lé, i pran azot pou in zéro a la gosh in shif ! A, si out pov momon té i oi aou, mi domann kosa èl noré pans de ou !

Justin la fé aèl pou répons :
Mon vié matante, si ou i konétré koman out kozman i pass déssi moin konm de lo déssi fèy sonz, sansa déssi la plime kanar ! Pars, ète kritiké par in moun kom ou, sé près in fièrté pou moin...
Ou i parl mon momon, mé sak ou i koné pa, sé kan bann fanm la gingn lo droi voté, momon la voté. Épi pa pou la droite, kroi amoin ! Alor si èl lété la samdi, moin lé sir èl noré parti Sinpièr èl ossi. Mète mon min dann fé, moin lé sir i bril pa !
Tank’a out kozman déssi bann vaza, éskiz mon pardon, mé vaza na poin sa dann nout parti. Nout tout, nou lé kamarad, in poin sé tou !

Justin