In moune apré parl la rogoumantassyon la faktir lénèrji, dann in lakwaryom privé laba dann Paris. Mwin la bien konprande lo moune té apré lir sa dsu Google é toutsuite mi poz amwin la késtyon si sé in faké sansa si sé in vérité. I fo touzour wi poz aou késtyon-la koméla.

Arivé mon kaz, mi sava ossi dsu lo Google an késtyon épi mi trouv lo nouvèl épi dann mwin mèm mi di si sak lo diréktèr i di lé vré, l’aquarium-la i sava fini an fayite. Mé kissa i di mwi sak lo dépèsh i di lé vré. Mwin lé sir d’arien pars li fé in bande prozékssyon ki amenn son dépanss kouran dopi trante mil éro par mwoi sé tan issi, ziska kat san mil l’ané proshène épi in milyon l’ané d’apré touzour par moi.

Donk ala ké mi poz amwin o moinss dë kalité késtyon : promyé késtyon in dépèsh néna poin vingt sink lign lé vréman sèryé sa pars mi oi pa ditou kossa i pé pèrmète fé in kalkil konmsa. Alor mi doute, pars mwin la poin arien de méyèr k’sa pou fèr.

Dézyèm késtyon mi poz amwin sé si la pa lo rézilta la politik l’Érop épi l’OTAN la déklansh sa, kan toute la bande la pran parti kont la Rissi épi la désside zot téi sava boyekote péi-la. An touléka si sé sa, ala in boykotaz intélizan pars li toush pliss lo boyekotèr ké lo boyekoté.

In troizyème késtyon néna rapor avèk lo travaye Paul Vergès épi l’ONERC la fé dopi l’ané 2001. Finalman mi rapèl toute sak Paul Vergès téi di étan vivan kan li téi di partou téi falé in miks énèrzétik dabor pou anpèsh lo réshofman lo klima, dézyèmman pou gingn éskiv in pé la shèrté lo pri lénèrji.

Lé kant mèm in pé domaz ni romète nout sor rante la min demoune soidizan kalifyé final de konte k’i oi pa pli loin ké lo boute zot né. A bon ékoutèr, salu !

Justin