Mi panss pou l’informassion lo pape na poin arien d’myé k’sa pou rapèl lo grav problème ni koné épi, pou nou, koman-koman in sinp lakssyon solidarité i sifi pou amenn lo problème Chagoss dsu lo toi l’imanité, dan la min in gran l’otorité moral épi rolizyèz.

Samdi dèrnyé in délégassion rényoné lété laba Maurice pou in l’akssion solidarité avèk lo pèp shagossien-lété lo sinkanténèr lo dèrnyé konvoi an bato pou tire la totalité d’in pèp dann son bannzil natal épi pou déporte pèp-la dann sak lété riskab d’ète in zénosside pétète fizik, sirman kiltirèl pou lo pèp shagossien. Donk l’avé in témoin é li téi vien pou rakonte son martir, dizon la plé rouvèr dann son kèr d’zanfan kan li l’avé dizan é sa i singn ankor ziska zordi, sinkantan apré.

Lavé in l’éstrade, li la monte anlèr épi li la di sinploman : na poin papyé dann mon min- li l’amontr son min vide é li la kontinyé-zordi mi vien pou koz avèk lo kèr é toute demoune la bate la min pars linstan-la napoin arien té pli vré k’sa pou nou k’lété la.

In troizyèm zistoir mi vé partaz avèk zot,sé listoir d’in banderole : in banderole i sorte la Rényon an solidarité avèk chagos é pou réklame lo pri Nobel pou lo pèp shagossien. Banderole-la la zoué in rol inkroiyab tèlman li té inportan mé lo moman lo pli apréssyab sé kan Julie Pontalba- la jenn prézidante lo mouvman rényoné pou la pé-la parti rode Promyé minist Maurice, MR Pravind Jugnauth épi l’amenn ali tir in foto avèk Méssyé Olivier Bancoult épi toute la délégassion rényoné : in sinp zèsst mé pli inportan ké bonpé kozman dsu l’angajman gouvèrnman morisien pou soutien lo pèp shagossien, é pou apiye azot konm pri nobèl pou l’ané 2023, é anplis pou marke linportans lo rol la solidarité rényonèz- pétète ossi in gatir l’amityé rante Maurice é nou pou l’avni. Mé sa sé anou d’fèr ké l’arb i done son frui.

A bon antandèr, salu !