Mwin la konète in péshèr kanote téi di konmsa : si mi sava loin mèm avèk mon kanote, si mi déssote réssif épi mi pouss déssi.V’ariv in l’èr m’a trape la lign d’orizon épi pétète m’a tobm dann fon ; Dann tan-la mwin téi sava lissé épi mwin l’avé aprann la tèr lé ron. Mwin l’avé in glob térès é mwin la fé oir ali mé mi panss pa li la obliye son lidé konm de koi laq tèr lé plate.

Antanssion la pa arienk bann moune tré pé instruiyé i di dé shoz konmsa. Dé foli sé bann sava dann zot péi k’téi di dé shoz konmsa : konm par égzanp bann demoue téi frékante bann nazi laba dann lalmagn é banna zot ossi téi kroi bann zidé fo konmsa.

Pou sak la konète la fin vintyèm syék épi komanssman vintéinyèm néna sak i kroi lo klima té apré réshofé-sansa déréglé si zot i vé — é sa téi mète lo mond dann danzé mé néna sak i kroi pa ditou in n’afèr konmsa. Alor zot i di na pwinn réshofman, limanité lé pa dann danzé, mèm d’apré zot l’om na pwin okin résponssabilité dann réshofman — dérègloman la tèr.

Antanssion la pa bann moune kouyon-kouyon i di d’zafèr konmsa. Néna mèm in pé lé prézidan bann gran-gran péi konm lamérik é pa pli loin ké néna dé-troi zour li la di li la fine ranport la viktoir dsi sak i kroi néna in réshofman d’la tèr é toute é ninporte kwé lé in bon pou zot démonstrassion… Konm koi bann fo zidé néna la vi dir é kan wi panss zot lé mor an réalité zot lé bien bvivan.

A bon antandèr salu !

Justin