Lotrozour mwin la vi in roportaz dsi in lizine lo diréktriss sé in robo é èl i travaye vinn-kat dsi vinn-kat san poz, san konzé maladi, san vakanss. Biensir lo bann travayèr té bann robo galman é zot ossi néna in randman mi rakonte pa zot.

Lotrozour ankor mwin la vi in bar na kaziman pwin d’moune i travaye dédan mé bann robo imanoïde é bann konsomatèr zot sé dmoune. Ni pé avoué sa sé in drol sossyété é in drol limanité.

Talèr-la dann télé mwin la vi in sékanss dsi la guèr-sa i mank pa sa-Dann in kan na solda imin é dann l’ote solda imanoïde é biensir bann zimanoïde la gingn la bataye bann télé téi amontr anou.

Toussa la pou dir l’om l’apré prépar ali in drol de relèv é biensir sa i mérite in réflékssion pou konète oussa ni sava, kèl valèr nora dann in mond konmsa. Kan limanité i robotiz lé bien nésséssèr ni poz anou késtyon… Kan limanoïdité i ranplass limanité oussa ni sava.

A bon antandèr salu !

Justin