Matant Zélida la ékrir justin :

Mon shèr nové, mon spès salté, rouj-de-fon dovan l’éternité,
Konm mi konpran,zéléksyon d’mèr i ariv é bann rouj-de-fon i sava armas in bon rinsé d’apré lo bann sondaj i pass dann zournal. Lé normal ! Kan la fine manké ; la fine manké. Konm moin la lir par la , i pé pa zète épi an avoir été. Mi konpran pa tro bien sak la pèrsone i vé dir, mé sak lé sir, li vé dir pou in pé la fine manké é bann zéléktèr la fine bien konprann. Donk, an parmi bann rouj-de-fon moin lé sir é sèrtin i sava ète lékatonm. Tok ! Pran sa pou toué !

Justin la fé pou répons :

Mon vyé matant ki koz touzour la boush rouvèr,
Mi antrovoi a popré sak ou i vé dir, mé sanm pou moin la pa bézoin viz bann moun nout parti pars sak ou i di i pé zète vré in pé pou tout parti...Mé, konm mi di aou, mi profèr oir lé shoz d’in n’ot manyèr. mi sèy oir dann bann kandida kisa i vé vréman ansèrv la popilasyion é kisa i vé ansèrv zoit posh. Donk i fo dabor alé gard kisa la anrishi azot dann la politik, sansa mèm an fézan la politik. Pou kosa ? Pars la politik i anrishi pa son moun si i réspèk vréman lo bann règloman. Sak i di tout politik lé rish, ébin sé konm zot i di tout bann zanglèz lé rouss. Matant, ou i koné bien la pa vré ! Na in pé d’politik la posh lé plin, mé na sak la posh lé pa plin é lé izé afors ansèrv la polilasyon.

Na in n’ot manyèr disting bann kandida dann zéléksyon : nana sak i rès modèst épi sak lo jabo i grosi. Nana salk i rès tèl ke zot i lé , nana sèk i shanj tout-o-tout. mi pé dir aou moin la koni dmoun i rès tèl ke sé, é moin la koni sak i gingn gro jabo...Malèr pou zot kan zot va pèrd ! Malèr pou zot kan bann zéléktèr va anvoty azot asiz. konm di lo kont,..kan va fé dans shoviy gonflé zot i rès ar pa dsi zot shèz. Mé Marcel Pagnol téi di osi kan va fé dans bann kouyon, zot i rès ar pa asiz !

 Justin