Mésyé, Médam, La sosyété, koz èk moin sé koz èk in kouyon mé sé o pyé d’lo mir k’i oi lo mason. Zot k’i viv an parmi l’moun konm moin, zot i konpran bien kosa nout kozman i vé dir sansa plito zot lé konm moin apré souéte in shanjman dann la sosyété. An parlann baton, zot i koné néna in bout pou tienbo lo baton é in bout pou tap dsi la tète in pé. Sorman kan ou i kalkil bien ou i apèrsoi néna in pé rant nou-nonbré biensir !-la toultan gingn kou d’baton dsi la tète, donk lété toulan in mèm koté lo baton é d’ot téi fé arienk tapé, tapé dsi la tète in pé. Sa i vé dir osi dopi ké lo mond lé mond néna touzour in koté bann zésploitèr épi l’ot koté bann zésploité é oplis ni sava oplis lé konmsa. Mé kant mèm, la pa pou sa l’imanité i vanj dopi dé tan é dé tan. Dopi dé tan é dé tan, l’imanité i éspèr na pi zésploitèr, donk na pi zésploité. Lé ga, néna kant mèm demoun i kroi la sosyété san klass zot i pans pa ? An touléka néna ké sa k’i ral amoin. Alé ! Mi kite azot rofléshi la dsi é ni artrouv pli d’van. Sipétadyé !