Mézami si zot lé kroiyan, mi oi déza kossa zot l’apré majiné. Mi oi déza in pé apré majine kan la vi lé fini, néna in n’ote vi i komanss déyèr. Mé sak lé pa kroiyan, kossa li pé maziné li ?

Si li éstime la mor konm in poin final, lé sir ké pou li, kozman-la i rime arien. Mé san alé ziska lo boute di boute di boute, si nou lé kapabe bien obsèrvé si la vi i tire l’éshèl dsi inn parti noute parkour, li rouv dsi in n’ote parti, épi ankor apré dsu in n’ote, é lé konmsa shak foi la vi i kass in kontour.

Alé ! Mi kite azot rofléshi la dsi, é ni artrouv pli d’van. Sipétadyé.

Justin