Mézami provèrb-la sé in provèrb in péi i apèl Haïti é pou konprande ali mi panss lé pa si konpliké ké sa… Sirtou pou bande léktèr noute zoinal Témoignages pars ni koné bien zot lé vèrssé dann la kiltir kréol popilère. Lé pa in mal, lé même in bien k’issi La Rényon néna demoune konmsa.

Astèr lo sanss kozman-la sé koi ? Sanb pou mwin dë dalon i frékante souvan défoi inn-a-l’ote, zot i kotoiye lo mèm moune, é i ariv ké zot i kour lo même danzé. Alor forssé si inn i gingn in kalpate in pé toute kalité kissoi konomik, kisoi d’voizinaz, kissoi ankor zidissyère, si ariv inn in kanikrosh, lé pa loin ossi pou l’ote.

Mi rapèl dann tan la répréssion té for, in pé kamarade téi dor pa zot kaz kan zot i antan dir zandarm la fine pass la kaze in dalon kominist la vèye pars lé sir lo proshène vizite la loi n’arté pou zot. Sé pou sa, nou bande zanssien nou la fé noute klass dann tan-la é nou lé pa paré pou obliye bande lesson la vi l’aprann anou.

Alé ! Mi kite azot rofléshi la dsi é ni artrouv pli d’van. Sipétadyé.