Moin nana konm linpréssion nana inn-dé lidé i rant pti-a-pti dann léspri dmoun... Zot va di mi pran mon lanvi pou la réalité, mé si moin nana lanvi, i vé dir ossi nana in réalité k’i fé oir ali fir-a-mézir... In zour, li lé riskab débarké, klate an plin dann solèy, épi demoun va di : « Bin ou té la don ! par kèl koté ou la passé pou ou arivé ? Kèl shomin ou la pran, konbien tan ou la mète ? »...
Mi antan bien “séga”, “maloya”, “mète anlèr”, “nout listoir”, “kossa in shoz” : sak lé ansien i arvien nouvo. Épi, lo nouvo pou vréman, li ossi, li ariv : dévlopman dirab, lanvironman protézé, lénèrzi, lo ko-dévlopman. Oplis ni antann sa, sé oplis na dmoun i anparl dé sa, konm in kèshoz nèv, in kèkshoz rafréshissan, in nafèr i soulaz doulèrnout l’am, i mète a nou dann in léspès konfor, nou lé zènn, i mète a nou dakor avèk nou mèm, i mète anou an douss ivrèss...
A ! nout kiltir ! nout lamour pou nout péi ! Nout vié zansète, kan ni rotrouv ! Épi, nout mazinassion, nout sansibilité, nout kapasité pou invanté... Na in tan téi di dann péi déor : si i anparl amoin kiltir, mi tir mon pistolé... Issi téi di : si i anparl la kiltir, mi tir mon CFA. Tan-la lé fini ? Tan-la lé pa fini ? Li la anfahi, tou lé ka.

Justin