Domaz ékrir in n’afèr konmsa, sirtou si aprésa, néna in lagréssion avèk bann bonbardman, bann déstrikssion san fin, épi la mor in kantité d’moune san défanss.

Sak mi sorte ékri i fé panss amwin sak la éspass dann golf Tonkin pou zistifyé la rantré an guèr l’armé amérikène avèk toute son bann moiyin dann bann zané soissante… Filmé dann télé, ni oi in bèl bato d’guèr amérikin épi in pti guiguine bato vietnamien, avèk in komantèr téi di sé lo pti ké la agrèss lo gro.

Inn krak biensir d’apré sak mi rapèl é poitan sa la zistifyé la guèr total améné konte lo Vietnam par larmé amérikène épi sète son bann zalyé. Kèl soufranss pou lo pèp vietnam kan i koné konbienn tan la guèr la diré, kèl métode té itilizé é koman ziska zordi lo pèp vietnam i pèye ankor lo bann konsékanss.

Biensir L’amérik néna poin lo monopol bann fake new é zordi ankor in pé partou kan néna in lintervanssion armé néna an paralèl la guèr psikolozik bazé dsi lo mansonz, la falsifikassion, bann foss nouvèl… Mwin lé sirésèrtin dopi ké lo mond lé mond l’om i ansèrv bann métode konmsa épi aprésa i démanti mé lo mal lé fé, la guèr lé déklnshé é dann toussa i koné koman i komanss mé konm i fini, i koné pa.

A bon antandèr salu !

Justin