Matante Zélida la ékrir Justin :
Mon shèr nové, mon s’pès salté. Moin lé sir out kap-kap la di lévé la somène passé. Pa pou lo spès sinéma lo shanjman klimatik, mé akoz dé-troi parol pti méssié Jégo la donn azot, azot bann rouj de fon. Li la di sé par lotèr la rézion si la vi lé shèr ! Ou i koné kissa i lé prézidan la rézion ? Ou i koné, ou ! La pa bézoin mi rafréshi out mémoir ? Parlfète, ou i pé prann in pti l’aspirine, si ou i vé, la mi sava fatig aou moin-la ! Donk, li la di i fo la rézion i bès le l’octroi d’mèr déssi do ri, déssi bann voitir “ibride”, déssi bann marshandiz i ashète an réskopondans (oui, koréspondans... sa topète-morète) plis in kinzène mézir pou diminié lo kou d’la vi, épi pou gonf lo pla kréol. Tok, pran sa pou toi !

Justin la réponn aèl :
Mon vié matante, kèl tok ? Kèl “pran sa pou toi” ? Lo zour ou va konprann in n’afèr konm toulmoun la pankor kléré. Matante, le l’octroi d’mèr, sa i oss-bèss pa konmsa sa : i fo domann l’Erop si èl lé dakor, akoz lé blizé modifié la loi pou pran an kont bann produi méssié Jégo la di. Konm di banna : sa lé bien ankadré sa, l’octroi d’mèr-la. Sa i oss-bèss pa konmsa ! Pou konplète lo tablo : li vé fé bèss so linpo déssi bann produi konm do ri, alé oir la poin la-dsi ! Épi si i diminié lo linpo déssi bann loto “ibride”, ou i sar ashté inn ou ? Out porte-moné lé pa assé plate ! Mi oi aou la-dan. Daoir lo “kass-in-ki” k’i ansèrv aou dalon va amèn lo loto ?

Mon dié ségnièr, matante, siouplé. In bon z’afèr ou i sousié pa, mé kan i di in bétiz, ou i trap sa a la vol !

Justin