Madam, Mésyé, La Sosyété koz èk moin sé koz èk in kouyon mé sé o pyé d’lo mir k’i oi lo mason. Si mi di azot demoun konmsa lé rar konm korn lapin, zot va dir amoin non. Pars zot i koné in tèl, intèl épi intèl i aplik toultan prinsip-la. Solman mi pans zot sar dakor avèk moin kan mi di azot la ras politisien-dizon la ras demoun in poin sé tou - té fine mor si té i aplik prinsip-la. Di pa moin demoun i aplik prinsip-la, lé konm in pyé d’boi i kashyète la foré pars lé pa vré non pli. Sak lé vré sé ké la ras mantèr, sète-la lé pa paré pou étinn pars la rolasyon rant moun é moun lé souvan défoi gomé par la mansonjri. Mi rapèl kan moin té lékol l’avé in marmaye mantèr é l’avé in kozman téi di konmsa : pli mantèr k’intèl é sa téi mète lo boug an kolèr . In pé téi di lété pars son répitasyon d’mantèr té ataké, mé moin lé pa sir k’lé vré. Anfin tousala lé fini é ni pé pi artourn dési mé ni pé kant mèm rofléshi in pé dsi kozman marké an-o la épi ni artrouv pli d’van sipétadyé !