Sa sé in kozman i sort loin sa ! Sa i romont dann tan té i tiliz bann zinité d’mézir pa konm sak ni koné koméla. Létshi téi vann par « san »-cent. Zèf té i vann par ta-in ta té i vé dir « troi » ; kann té i kont an mil kilo.

Donk i, zour la shanj lo bann z’inité é in pé d’moun la pa konprann tout suit. Mi souvien in kozman kamarad Bolon, in moun Lo Por. Li té i di an riyan, in sindikalis plantèr la di ali : « Antansion lo mo ou i di ! Pars bann vyé plantèr kan ou i di tonn zot i konpran bate-fé. Bate-fé ? Sa sé in tik-tak konm par ébzanp dé bout rosh dir. Ou i bate inn kont l’ot avèk in bout la mi shoka é lo zétinsèl i mète lo fé dodan. Mi di pa zot koman, mé alé oir dann google « batte-feu » é zot va oir kosa i lé. Pa sir zot va gingn alime do fé !

Pou arvni dsi mon kozman. Sa i vé dir solman, i fo ou i koné kosa in moun i konpran kan ou i di in mo. Pars si li konpran dovan-déyèr, mi pans pa zot na la shans fé konprann azot. Alé ! Kosa sa i di azot ? arien ! Mé fé travay zot koko, fé bouy zot matyèr griz é zot va oir ké, rant-rant ni pé tonm dakor rantre nou. Fé roulé férèr !