Mézami tan lontan té pa konm tan koméla.

Koméla kan la bézoin la vyande sansa son bande transformassion i sava dann grande sirfass. Lontan déssèrtènn famiye té i tyé in koshon tazantan épi téi fé zot mèm lo transformassion. Kanta Sossiss épi boukané téi mète azot a fimé, shakenn son plass san mélanzé é téi fé kui inn épizapré i fé kui l’ote-zamé inn é l’ote mélanzé konm koméraz i fé koméla.

Mi panss sé pou sa i di in kozman konmsa… Astère, konm sa sé in provèrb i fo rode kossa li vé dire dann la vi an sossyété : mi panss lé sinpe é i vé dir sinploman kan i koze avèk Zak i koze avèk Zak, é kan i koze av èk Pol i koze avèk Pol. Pol i mélanze pa kan i koze avèk Zak é Zak i mélanze pa kan i koze avèk Pol. 

Alé ! Mi kite azot rofléshi la dsi é ni artrouv pli d’van. Sipétadyé.