Po d’shanm ? Sa in n’afèr lé plito rar isi La Rényon… sof pou marmaye tann. Mé dann tan d’avan sa té in n’afèr l’avé dann tout kaz vi ké konm i di, dann tan d’avan l’avé poin tout lo bann komodité... Mi pans zot i suiv amoin kan mi di sa ? An touléka, kozman an-o la, i konsèrn pa pou d’bon po d’shanm mé d’moun dsi lo poinn vizé son sans figiré. Sa i vé dir, i fo shakinn i koné rès son plas é pa pran la plas lé zot. « Kan mi parl avèk sosis, boukané i rès pandiyé ! » Sa in n’ot fason pou dir la mèm shoz. La mèm shoz sé koi ? Sé la pèrsone i défann son zardin intèryèr, son prop z’afèr. Sa lé inportan koméla in kékshoz konmsa, an touléka sa sé in valèr ké bonpé d’moun i partaz é la pa pli mal konmsa. Alé ! Mi lès azot kass z’ot tète la dsi é ni artouv pli d’van sipétadyé !