Konm shak foi k’in zéléksyon i ariv, l’UMP i rolans ankor in kou son ranguène dési la frode z’alokasyon. I prétan la frode i port dési troi milyar la-ba dann la Frans. Isi La Rényon, i paré la frode dési z’alokasyon i port dési kat milyon a popré. Kat milyon, sa i fé in bon moné, mé in pti guine-guine par raport lo bann milyar i vèrs, dann nout péi, késtyonn z’alokasyon. Sa i anpèsh arpa in bann tonm dési lo do bann moun i toush larzan zanfan, é sa i anpèsh arpa zot agoniz zot bann konpatriyot avèk tout bann zadzéktif pli pir inn ké l’ote. Fanm sèl la zourné, mé pa la nuit ! Moun parès ! Moun na gro loto ! Étsétéri-étsétéra la ké lo ra.

Solman in shif sé in shif, é li doi zète konparé avèk d’ot shif. Par égzanp, nana in bonpé l’antropriz i pèy pa kotizasyon, pars i anploy demoun o-blak, pars i déklar pa tout lo bann travayèr... bin, arienk sa i fé pèrde la sékirité sosyal rant kinz épi dizuit milyar l’éro. Sa sé pliské la frode dési zalokasyon, mé i anparl pa de sa, i trouv mèm bann l’antropriz na rézon vi k’la sékirité sosyal lé si tèlman gourman pou réklame kotizasyon, é si tèlman pirate pou pèy sak li doi. Akout in pé radyo perkal é zot va oir si mi égzazèr !

La pa arienk sa, pars demoun na in bon moné, in pé anparmi i frode dési z’inpo. I prétan l’État i pèrd sinkant milyar so fason-la. Mé bann moun-la, sirtou bann gro, lé si tèlman rokomandab, lé si tèlman itil pou lo péi. Donk, i vo myé pil dési bann ti. Kan i bransh lé a-tèr, i marsh dési ! Lé pa vré ? Arzout èk sa, kan bann ti, zot mèm, i pil dési zot frèr la mizèr.

NB : Par l’fète, moin la lir par-la madam Bettancourt, a l’insi d’son plin gré, la fé in kou d’frode dési z’inpo épi i paré li sar blizé ranbours trann-sink milyon l’éro. A ! Liliane-Liliane, kosa l’arivé don ? Bann shif la zoué an fou-fou dann out tète ?

Justin