La Rénion, mi èm aou, mé dé foi, mi trouv ou in drol péi avèk in bann drol moun. Ni èm krétik anou rantr nou. Konm di Marcel Pagnol : « Ni oi lé z’ot an noir, akoz ni vé pass pou moin gri ! »

In tan, lété bann fame sèl téi pran pou z’ot grad : sèl la zourné, pa tousèl la nuite. Koméla sé bann moun nana érémi i fo tap déssi : in bann parès... k’i travay o noir ! I voiyaz, i viv dann lo liks alors ké sak i travay déklaré i ral lo diab par la ké ! I pèy pa zinpo, néna gro loto ! La pa bézoin mi di tout, rouv soman inn-dé radio, zot va oir koman bann moun-la i pass lo tan gingn boubou déssi la lèv... an kozman bien sir !

Gouvèrnman i sort trouv in manièr pou fé krétik ankor plis bann érémi. La i sava kontrol azot sérié ! Mé la pa rienk koméla i kontrol azot, an tou tan la kontrol azot. Tazantan i koup zot lokasion, tazantan i obliz azot rann larzan, tazantan i anvoy azot tribinal. Lé riskab ète pli séver ? Sa va donn travay demoun ? In grin. Sa va anpèsh in pé alé volé ? In grin. Va fé bate la lang démoun kont zot prop famiy, zot prop kammarad, ‘ot paran sansa z’ot zanfan.
Kan in bransh lé atèr, toul moun i marsh déssi.

Justin