Moin la fine di in bonpé d’foi, nana z’afèr pou tir dann kann, é ni tir près-pa. Moin na poin l’intansyon anparl bann rishès-la, pars sak i vé konète, li na ka fouy déssi internet é mi pans li va gingn toute ransègnman li vé an avoir. Mé l’aktyalité i amène anou ankor in kou déssi so rishès an jashère k’i apèl kann, sansa kann-a-sik.
Akoz, d’apré zot ? Pars La Rényon i konète in séshrès i plézant pa, é bann plantèr l’apré domandé koman kontante la soif zot z’animo épi koman kontante la fain zot zanimo. K’i di séshrès i di mank dolo, mé k’i di séshrès i di osi mank fouraj pou z’animo. L’èr-la, in pé i di konm de koi i fo arète bril la bagass pou done manzé z’animo. In bon l’idé biensir. Mé si ni kalkil bien, konbien kantité mil tone fouraj la zété pandan la koup : zanvlop li ! lo shou li ! la paye li ! Sa, pou zété, lé sir nou la zété.
I rovien amoin in n’afèr in bon kamarad la rakont amoin. Inn an parmi son bann famiy la déside fé in lantropriz pou ramas la paye kann. Pou arvann bann z’élvèr kan va ariv a manké. Le boug la gingn in pèrmi konstruir, mé l’administrasyon la kal lo z’afèr pou pa k’i gaspiy térin agrikol. L’afèr i suiv son kour, mé mi pans in l’antropriz konmsa nora été bien itil dann in tann séshrès konm sak ni koné. Bien itil, mé l’administrasyon i oi pa pli loin ké lo boute son né.

Justin