Oté

Kan in lotonomi sé in fo é pa in vré : pa konfond la politik Paul Vergès é sète Didier Robert

Témoignages.re / 21 avril 2021

JPEG - 43.6 ko

Mézami, kan Paul Verges, prézidan la Réjyon, épi son bann dalon la lanss lo shantyé lotonomi énèrjétik, ni pé dir li téi aviz o moinss dë bite :
- pou komanssé i voulé mète in poin final avèk lo sharbon épi lo pétrole donk favoriz lo dévlopman lénèrji prop, avèk in miks énèrzétik.
- séryèzman diminyé bien konm I fo lo linportasyon sharbon épi bann produi pétrolyé toussa pou soulaz noute balanss komèrsyal-dann tan-la bann produi-la téi pèz in pé pliss ké uit san milyon d’lëro.

Mé a bien rogardé l’avé in n’ote bite inportan é sète-la, sanm pou mwin, lé ossi inportan ké lé dë promyé sé pou La Rényon trap son lotonomi-donk son libèrté - dann sèktèr lénèrji, in séktèr vital pou l’avnir nout péi.
Donk ni pé dir l’avé in poinnvizé ékolojik, in poinnvizé komèrsyal donk ékonomik, épi in poinnvizé idéolojik. Mi éspèr in bonpé d’moun la konpri sa pars solon mwin sa sé konm k’I diré, dopi 1959 lidé d’baz la politik Paul Vergès, son fil rouj dann la vi piblik.

Si zot i lir lédito zoinal Témoignages yèr, mwin lé sir zot va bien konprann la diférans rant la politik Paul Vergès dsi lo poinnvizé d’lénèrji épi sète Didier Robert-sak désèrtin zoinal téi prézante konm lotonomiste rényoné-alé oir lété arienk in lotonomiss trafiké, in lékoloziss manké, é in politik ékonomik bazé dsi lo biznèss tou zazimute, é l’anprofitasyon pèrsonèl dsi bann rosours piblik.

Sirtou a pa konfond !