Mézami koz avèk mwin sé koz èk in kouyon, mé a kouyon kouyon édmi. Mi sort ékri inn-dé mo anlèr la, mi panss pa sa sé in proverb, mé sak mi koné sé ké lo sans lé klèr, klèr konm lo klèr.Kozman-la sé pou dir avèk zot koman lé konpliké suiv la konvèrsasyon d’moun, kan i trok langaz épi i di bann zafèr kontradiktoir. Final de kont, kan In pé I di A é d’ot I di B, demoun I arête konprann kossa I di.Parèye kan in shartyé I amen son bèf épi li di an mèm tan : alé droite, épi alé dsi koié.Mwin la konète in ga téi amen in karyol épi li téi di hu ! Apré toutsuit apré li di glii ! Mi pé dir azot in zour lo bourik la kal an plass. Li la pi vouli alé ni d’van, ni déyèr pars sanm pou mwin li té I koné pi kossa I fo fé. Défoi demoun ossi lé konmsa : kossa zot i fé kan i di azot fé dé zafèr kontradiktoir an mèm tan.Mi diré mwin néna in gran anvi fou tout an plan é baré. Défoi mi bar pa, pars mon momon l’aprann amwin la politès. Alé ! Mi kite azot rofléshi la dsi é ni artrouv pli d’van. Sipétadyé.