Oté

Kan in vyé moun i mor, sé in gran liv k’i brile

In kozman pou la route

Justin / 19 avril 2021

JPEG - 43.6 ko

Méssyé, Médam, la sosyété koze èk mwin sé koze avèk in kouyon, mé sé o pyé d’lo mir k’i oi lo masson. Mézami zot i koné sirman in kozman konmsa, mèm si lé pa parèye san pour san sak néna dsi zot disk dir, é zot I koné biensir proverb-la i sorte l’Afrik. Alor alon kalkil in kou kossa kozman-la i vé dir : sa I vé dir opliss la pèrsone i viéyi opliss èl i koné dé shoz itil pou son koléktivité. I di souvan bann vièye pèrsone sé bann gardien lo tanp, i di galman sé in band passer d’konéssans, épi passèr d’éspèryans. L’èrla kan li mor li less in gran vide... Mé, konm i di souvan dé foi, toussa I dépand la plass band vyé dann la sosyété : si la sosyété i rokoné li zoué in gran rol ébin lo kozman mwin la mark an-o la i tienbo la route. Mé si lo vyé moun lé mal konsidéré, si pou l’moune li lé konm in parazite, in moun initil, ébin lo kozman mwin la marke an-o la i pé pa aplik ali. Alé ! Sèl zafèr mi pé dir azot sé rofléshi par zot mèm pou démaye lo vré avèk lo fo. Alé ! Mi kite azot rofléshi é ni artrouv pli d’van. Sipétayé.