Pou mon par si mwin la aprann dé shoz dann liv épi dann bann média, sansa lékol avèk mon bann proféssèr, sé avèk bann vyé moune ké mwin l’aprann lo pliss zafèr dsi nout patrimoine.

Pou kossa mi di sa ? Pars si la vyèy pèrsone néna an souvnir sak li la viv par li-mèm, li néna galman dsi son dik dir sak li la aprann avèk bann pli z’anssién ké li. Arzout èk sa ni pé dir li la fé pass bann konéssans dann lo moul son sazèss épi son réflékssion.la konéssans oui mé a son fasson.

Sé pou sa, mwin lé dézolé kan toudinkou déssèrtin an parmi mon bann vyé kamarad i pèrde la mémoir é firamézir la konéssanss épi lo souvnir i éfass dsi lo disk zot mémoir konmsi la pass dossi kékshoz mi pé apèl in éfass-avèk..

Donk, mi ankouraz la zénèss pou ékoute bann zanssien é pou anroziss zot ossi son konéssans dsi zot dik dir pars nout tout i doi zoué lo rol passèr d’mémoir.L’IA i trap pa sa.

Alé ! Mi kite azot rofléshir la dsi é ni retrouv pli dvan sipétadyé.

Justin