Zordi sé in n’afèr banal. Mi souvien dann la kanpagn député in kandida dann l’est la anparl bande danjé noute bor d’mèr téi kour dopi Sinte Sizane ziska Sint-Roz, la ravine glissante é sa la tonb konmsa san konsékans plisské sa. Néna inn-dé somenn so kou issi la anparl dann zoinal sak lé riskab arivé dann la bé Sin-Pol épi Sin-Louis avèk in rolèvman nivo la mèr par-la dë mète. La pa in movèz plézanteri mé in n’afèr noute zanfan sansa noute pti zanfan va konète. Aprésa , silanss radio ! néna arienk sa pou anparlé don ?

Mwin lé a d’mandé si i fo pa poz lo késtyon otroman-késtyon d’fé dor anou dsi noute dë zorèye- an dizan, sé Paul Vergès téi tir lo signal d ’alarm, mé konm li la fine pass l’ote koté i anparl pi, donk lo danzé la disparu.La météo i anonss siklone donk nou na ka siprime sa-pa d’siklone- i sifi d’siprime la météo é nora pi pou nou trakass anou.Kool Baya, kool !

Normalman kan in danzé konmsa i ménass toute bande résponsab i doizète mobilizé pou tash moiyin trouv lo bande solission k’i fo pou ékarte in pé lo danzé, sansa pou trouv bande solission pou mète demoune a l’abri dann l’avnir mé ni fé pa sa : lo mèr,sa la pa son travaye, la cirèst, la cinor épi lé zot sa la pa zot travaye non pli, préfé, li lé la pou troi-katran pou kossa li va pouri son vi avèk sa ? Gouvèrnman, li néna tro a fèr.ède bande kapitalist gonf zot pla, sa sé in dovoir sa, é pa in lévantyalité.

Alor kissa k’i doi bouzé, é kan sirtou ? Kan siklone i ariv sé apré k’i oi lo déga. Parèye pou tranbléman d’tèr ! Parèye galman pou lo rotour i apèl lo tsunami !Kan néna radmaré, parèye, alor i fo atande lo nivo la mèr i monte « irémédiabléman » pou komanss bouzé.

Kan lucifer i vê pèrde in moune,sansa toulmoune, li rotir la rézon !

A bon ékoutèr, salu.