Zordi mwin la ékout la radio é dann zpoinal parlé mwin mla antann in tit téi di konmsa : « Pou la promyèr foi na pwin in sèl mèr kominiss La Rényon »… Ni pé dir lé vré dopi zélékssion 2026 na pi in sèl mèr PCR isi La Rényon. Wala in vérité i fé mal anou mé dizon wala in doli-vérité.

Pou kossa mi di sa ? Pa pars an missouk dann in koin in mèr noré pran son kart PCR-mi panss pa kékshoz konmsa l’arivé ! Mé mi v ékant mèm rapèl in tan l’avé pi in sèl mèr, in sèl konséyé zénéral, in sèl dépité kominiss.. Donk dsi lo plan la roprézantassion fitintan l’avé pi in sèl kominiss élu La Rényon.

Sa téi éspass lo tan la vyolanss, lo tan la frode éléktoral, lo tan téi mète zèf poul a kouvé épi téi sorte pti kanar. Lo tan nèrvi téi règn an mète… Koméla lé pi konmsa lé vré é koméla nou néna in problèm ronouvèlman é nout parti i ariv pa ronouvélé. Mé la késtyon lé pozé d’son ronouvèlman pars nout péi la bézoin d’in parti pli for ké li lé.

Nou la poin in baguète mazik pou trouv la solission mé i défann pa nou d’rodé. Lo péi la shanjé, lé vré ! lo pèp la shanjé lé vré ! nout lanvironeman lé plizanpli danzéré ! La franss i f émanèv, i amontr son fors mé antanssion amontr son fors sé rode boubou pou son kor. Sé rode problèm pou son kor é bonpé rényoné i konpran sa.

Mwin pèrsonèl mi fé konfyanss mon parti. Mi fé konfyanss dann son ronouvèlman é tardra viendra li va ronète, mi kroi.si mi oi pa mi panss d’ote va oir.

A bon antandèr salu !

Justin