Matante Zélida la ékrir Justin :
Mon shèr nové, mon spès salté,
A bon ! Zot i kroiyé nout ti-prézidan nora dégonf dovan la kriz ! Zot i pansé gro-tantine i komann l’Almagn nora drès sé kot ! Solon zot la Frans lé fèb épi lé z’ot lé gayar ! Mi di aou, mon nové, i grat pa l’korpion avèk nout pti zénéral an shèf ! Baba, li la konvok banna dimansh dann son gran mézon, li la souf dann z’ot zorèy, li la fé pèr banna ! Alor, tout la bann la di li nana rézon. Kossa zot i trouv pou dir la-dsi ? Zot bann rouj fonsé ?

Justin la fé aèl pou répons :
Matante, ou la pankor konpri lo fion banna don ? I fo fé sanblan ète dakor kan i fé la konférans, épi aprésa, shakinn i di sak li vé... pou pa gingn lo kou kan li rant dann son péi. Lo prézidan li ossi i tourn dann film-la ! So foi issi, la fé parèy mèm, san k’sa i jène azot kansréti, in pti pé. Shakinn pour soi é Dié pour tous... Mé kansa bann prézidan va déside grandi in pé ? Mi pans kan kok nora lo dan... pa avan !

Justin