Oté

« Kan konpère Lapin la fé tonbe atèr lo projé léléfan épi La Balène »

In zistoir pou rakonte dsi galé- promyé morso

Justin / 5 mé 2021

JPEG - 43.6 ko

L’avé inn foi, pou inn bone foi, méssyé lo foi la manz son foi avèk in grinnsèl.

L’avé inn foi konpère lapin l’apré bate son karé dsi la plaz é sa téi spass dann tan lé zome té pa la pou annuire band zanimo, mé la pa pou sa l’avé poin problème déza.La prèv :

Konpère lapin la sirprand léléfan avèk la balène apré koz an misouke inn avèk l’ote kaziman dann landroi konpère lyèv l’apré amizé. Noré di dë diplomate apré konplote dsi lo partaz di mond. Konpère lyèv la kashyète déyèr in touf léskine pou li ékoute kossa banna té apré rakonté é oila sak li la antande :

Kriké ! kraké ! Kriké Méssyé ! Kraké Madame !

« Komère Balène » léléfan la di : « Ou lé assiré noute dë ou sé lo dë zanimo sak lé pli for dann la kréasyon ! »

« Assiréman konpère » balène la fé pou réponss : « Mwin sé lo pli for anparmi band zanimo la mèrr é ou lo pli for zanimo néna dsi la tèrr »

Kompère Léléfan la roprand la parole son tour épi a di : « si sak ni di lé vré é pour sur k’lé vré, si noute dë ou i assosyé nout dë ou va komande lo monde é nora poin pèrsone sar kapabe anpèsh anou komand la tèrr épi komande la mèrr. »

Komèr Balène la arkomanss kozé épi la di : « Si ni tonb an antante nora poin pèrsone, okin zanimo pou anpèsh anou fé sak ni vé fé é toute va ékoute anou »

Kan lapin la antand sa, li la konprand toute zafèr é dann son kèr li la di : « Mwin lé pa dakor in n’afèr konmsa ! I fo mi kass zote plan ! »

Kriké ! Kraké !La klé dann out posh ! La taye dann mon sak !

Konpère lapin la parti son kaz, li la trouv bèl korde in zamiy épi li la di :

« Korde lé l’ère pou ète itil zordi, suiv amwin é m’a dir aou landroi ni sava é kossa ni sava fé ! ».La korde la di : « Alon, pass dovan é mwin mi suiv aou par déyèr. »

Asuiv-Promyé boute la fini mél o zistoir la pankor fini.