L’avé inn foi pou inn bone foi méssyé lo foi la manz son foi avèk in grinnsèl.
Donk, konm mwin la fine dir azot samdi dèrnyé, konpère Lapin la parti shèrch la korde, in bèl-bèl kord épi la di vien done ali koudmin. La korde la suiv ali déyèr épi zot l’ariv landroi lélé fan téi abite. Lapin la fé son diskour.li la di :
« Mon Roi, mi koné ou sé lo pli for an parmi band zanimo néna dsi la tère sé pou sa mi domand aou sokour. »
Léléfan la di : « Kossa l’ariv aou, Lapin ? »
Konpère lapin la réponde : « Mon roi, wi koné mwin néna in sèl vash é mi konte dossi konm mon soutien, konm mon manjé dan la vi ? Ala ké so matin èl la parti dann marékaje é èl la anfonss dann la bou. Mwin la éssèye tir aèl mé mwin la pa gagné. Mi yèmré wi rand amwin sèrvis la. Aprésa m’a konsidère aou konm mon roi. »
Léléfan té flaté é li done son lakor. Lapin l’amar la korde avèk lo gro zanimo sépa dan la ké, sépa dan la pate mé antouléka in lanfdroi li té bien fiksé.
Apré li di, lèss amwin astèr amre lo boute la korde avèk mon vash dann méarékaj aprésa m’a done dépar pou tir ali. Pou in zanimo for konm ou, mwin lé sir ar in sinp formalité.

Kriké ! Kraké ! Kriké Méssyé ! kraké Madam !
Astèr lapin i kour dsi la palz pou trouv Balène é li di avèk balène :
« Balène, balène, mi koné ou sé lo pli for zanimo néna dan la mèr é mwin lé paré pou dir ou sé mon rène si wi rand amwin in gran sèrviss. »
« Kèl sèrviss ? » Balène i domande.
Lapin I arkomanss son kozman avèk Balène épi li anmar la korde dan la ké Balène épi li di aèl atand, mwin va done signal. M’a sif rante mon dë doi é kan ou va antande mon siflète ou i pé tiré. konm ou lé for, mwin lé sir ou va vnyabou tire mon vash dann marékaj.

Mon zistoir la pankor fini-samdi k’i vien zot va gingn lir lo troizyème boute.