L’avé inn foi pou inn bone foi, méssyé lo foi la manz son foi avèk in grinnsèl.

Kan la korde té fine bien anmaré, in boute avèk Léléfan, in boute avèk Balène, konpèr Lapin la parti a popré dann milyé la korde épi li la siff rante son dë doi. In siflé si tèlman for lo dé zanimon d’in koté Konpèr Léléfan épi komèr Balène la fonss tou lé dé an mèm tan.

Kriké ! Kraké ! Kriké Méssyé ! Kraké Madam !

Promyé kou konpère Léléfan la tiré, Balène la domand an li mèm : « Kèl kalité vash i ral for konmsa ? Sirman sa lé amaré dann milyé la tère sa ! ». Son lorgèye la pran lo déssi é èl la ral a mor.

Kan Léléfan la gingn lo shok li la di dann son kèr : « Sa in bèf sa in dyab sa ? Sirman néna in troupo monstré i rotien ali dan la tèr. Mi fou in kou nou va oir kissa lé pli for ! »

In pé pliss balène i sorte dan la mèr pou tonb dan la sab. Inn i ral, l’ote i ral avèk shakinn in fors inkroiyab. Tazantan léléfan i roul atèr, tazantan Balène I mank sorte dan la mèr. Lo fraka lé térib. Toute zanimo I ariv pou oir lo gran konba rant Lélélfan épi Balène.

Shak foi k’inn i fou in kou for éké l’ote i manke pèrde lékilib band zanimo i bate la min. Tazantan pou Léléfan, tazantan pou Balène touziss si in pé i komanss pa paryé dsi inn dsi l’ote..

Kriké ! kraké ! La klé dann mon posh ! La taye dann oute sak !

Léféfan i kriye : « Kissa l’apré ral la korde konmsa ? ». Balène i kriye son koté : « Kissa l’apré ral la korde konmsa ? ». Band zanimo i bate la min épi i komanss rir inn-a l’ot. Momandoné la korde la shapé é Balène la pik in tète dan La mèr é Léléfan la fons dann la foré.

L’afère té fète. Léléfan avèk Balène la pi koz zot projé. Konpère Lapin pou son par lété kontan par raporte lo rézilta..

Mon zistoir lé fini. ! Si li lé vré li lé vré, si lé mantèr la pa mwin lotèr. Koton mayi i koul, rosh i flote. L’avé inn foi pou inn bone foi méssyé lo foi la man z son foi pou in grinnsèl éli kriye zour é nuite, « Rande amwin mon foi ! Rande amwin mon foi. »

La fini