Na in mové van i souf déssi gouvèrnman fransé. Dépi in bon koup de tan, bann zournal i di si, i di la, i fé ladi-lafé… é so z’afèr-la i tourn otour lo gouvèrnman, épi bann moun nana lo pourkoi an plis k’i n’an-fo... dé foi lé dé ansanm pars bann minis la Droite i profèr bann gro mazistra ké bann ti kolon : bann gro mazistra, zot i karès sa dann sans la plime i pouss.
Momandoné, gouvèrnman la anvoy fèr-foute. Momandoné, la di, sa in bann zafèr mantèr. Sak i rakonte sa, sé in bann sharjèr d’lo. Mé ti-lanp, ti-lanp, lo kou la komans marké. Ti lanp, ti lanp, bann Fransé la komans trouv sa in pé dir pou ankéssé, in pé dir pou gobé, é lo bann mantèr, lo bann dissimilatèr la komans rokonète pti pé par pti pé. Firamézir, la ral déssi la trip épi près toute la vni. I prétan dir nana ankor in boute dan vant poul !
Pli gro z’afèr, i antann koméla, sé lo trikmardaz rante madam Bettancourt é in bann politik, an parmi tantine lo minis Travay, méssyé Eric Woerth. Tou lé zour shak zour, nana in nouvo pyèss dann zournal. Lo minis i di li la poin aryin pou roproshé, i di mèm li tyinbo dboute droite dann son bote, mé tansyon lo bote ! Na dé foi ou i tash moiyin tiré ou i gingn pi, mèm i foute aou in tandinite vèy pa koman sa i fé mal.
Mé prézidan lé malis, li la domann dé konpars, dé sou-minis, pou démissyoné, pars zot la fé la kouyonade. Lé bon ! Mé zot i kroi demoun va oubli minis Travay ? Sanm pou moin, non. Konm di lo konte, kan koudvan i donn paké, tol i vol pou komansé, épi sé lo toi k’i sava. Ki vivra va oir lo véra !

Justin