Promyé romark : nout kuizine sa i fé parti d’noute kultur é konm poin for pou nout kultur i pé pa amenn ali an sharète shaviré. Souvan dé foi mi antan in gran sobatkoz dsu zépiss i mète dann rougaye konm dann kary. In pé i ral issi, in pé i ral laba. Finalman néna inn i fini par di : « Lèss ali si li vé mète safran ! Lèss ali si li vé mète kaloupilé sansa kotomili ! Lèss ali si li fé pa la diférans rante in bouyon épi in frékassé ! »

Mwin lé dakor pou k’shakinn i manj konm li vé mé antansyon, toush pa la tradissyon… pars sé sa noute mète d’ékol. Sa lé konm noute lang kréol rényoné sa mézami : sof mon réspé, nout lang lé konm li lé, avèk son vokabilèr, son sintax-gramèr, son laksan pou kozé é zot i véré in zour in moune i sorte laba déyèr solèye épi li di li vé rofé nout kréol in n’ote manyèr.
Erézi ! Bar aou !

La kuizine lé parèye ! Néna son bann prinsipe é ninporte ki i pé pa dir li vien issi shé nou pou rofé nout kuizine. Noute kuizine sa lé sharjé avèk nout listoir sa ! El la évolyé, el la vni pli konpliké, sansa pli sinp. Oki nou téi fé in kuizine pou pov ! Normal é sé la kuizine pov la mète an plass bande baz. Dabor bande pov la kui sak bande rish téi kui pa : kèr kane, oussa bande rish téi kui sa ? Kari la ké kuik, blan téi manz sa dann tan lontan ? Kari zak, kari la pate koshon Mi arète la mé mézami lo jéni sé sète avèk bande produi bordé la fé in kuizine kalité. Sé dann la mizèr ké limazinassion la travaye.

Alor alon pa trayi noute baz sansa v’ariv lo zour noute toute va manz kari la mélanz, sirsharjé avèk zépiss, sirsharzé avèk toute sorte produi normalman i maryé pa ansanb.. Zot i véré in zour in kari poisson, avèk shovrète anndan, épi la panne koshon, é d’ote zafèr lé bon shakinn son koté mé i maryé pa konm ki fo pou noute palé.

Mi lanss in apèl pou lo réspé : nou lé pa pliss, nou lé pa moinss, réspèkt a nou — A bon ékoutèr salu !

Justin