Dopi étan pti mi kroi momandoné l’avé la trète bann noir issi dann loséan indien é téi vann banna o zanshèr pou gingn la min d’èv dann bitassion. Mi koné mèm la date la trète la komanssé é ziskakan li la kontinyé. Mi kroi toulmoune i kroi sak mi kroi. Poitan sak lé évidan pou mwwin lé pa évidan pou toulmoune. Mi koné d’moune i panss la trète la zamé égzisté, vi k’lété bann moune i vien volontèrman pou gingn zot soso dann d’ot péi.

Dopi étan pti, dann mon famiye, konm dann mon vyé liv listoir, mwin l’aprann l’avé lésklavaz issi La Rényon. Mi kroi sak mi kroi, in lévidanss pou mwin. Mi koné la date i komanss épi la date ofissyél sa la fini. Mi panss toulmoune issi dann zot famiye l’avé bann zansète zésklav épi bann zansète ésklavazist. Mwin la antann parl zésklav zyé blé é sa i rèss zordi dsi mon dik dir. In lévidanss évidan pou mwin.. Mé mi koné demoune i di zot zansète l’avé pwin arien pou oir ladan pars zot lété ni zésklav ni zésklavaziss.

Dopi étan pti, dopi mon zénèss mwin la antann parl bann zangazé épi bann zangaziss. Alor kan la komanss fé sérémoni la Grann Shaloupe mwin la parti pars pou mwin dann mon bann zansète si l’avé bann zangaziss, l’avé galman bann zangazé é mwin la trouv normal bann malbar, bann kaf, bann malgash, épi bann shinoi inn kont l’oteépi d’ote ankor i sava laba oussa la mèr i bate inkroiyab pou majine zot zansète. In lévidanss pou mwin mé pa pou toulmoune pars mwin la antann in pé apré dir zot lé pa famiye avèk banna.. zot noré pwin zangazé dann zot zansète, ni zangazist é bin sa sé in n’afèr inkroiyab.

Kan la fé la sérémoni pou Paul Vergès mwin la antann kamarad Elie apré dir i fo ni lite kont l’aliénassion sak i fé ké ni oz pa dir ki ni lé é koman é pou kossa. Sak i fé k’ni rojète la vérité pou nou aksèp arienk lo manssonz. Si zordi néna in pé i di l’avé pwin la trète, si in pé i di l’avé pwin zésklav, ni zangazé, ni kolonizé ébin sé pa pars l’avé pwin mé pars zot i soufèr sinploman d’in maladi k’i apèl laliénassion… Pou mwin in lévidanss, pou d’ote lé pa si évidan ké sa.

A bon antandèr salu !

Justin