Na in moun dan mon fami i rèss si koté Sin-Lé. Sé t’inn bon moun, travayèr, son fanm osi i travay é zot dé na marmay. Malgré sa, trouv in kaz pou zot astè sé t’in rèv zot i profèr minm pa pansé. Zot i rès an lokasion dann in lapartman in boug zorey la zamé ni La Rénion, la asté térin dopi la Frans, pou défiscalizé.
Amoin sé t’in boug i bouz pa tro si koté Sin-Zil, Sin-Lé... Mi préfèr pa, i done amoin mal o vant oir koman bann gran kaz i pouss konm mové zèrb. Pass si la kot an loto i fé tourn mon vant akoz mi trouv nou la pouri lo bor la mèr, mi trouv pi somin pou alé dann sab, é osi akoz so bann zoli kaz i aral amoin. Si i fé mal mon kèr, potan moin lé pa zalou. Mé mi domann amoin koman la zénès atèr i fé pou arlèv aèl kan él i voi tousala kèl i gingnera zamé toushé. Défoi forstan la bav i koul, domoun i gingne la raz.

Zistin