A ! Moin lé kontan ! Moin lé mèm sipèr kontan ! Pou kossa d’apré zot ? Pars bann la bank la artrouv z’ot santé. Oui ! Toulmoun lé dakor pou di in n’afèr koma... Mi vé dir toute sak i koz konm in bann gran grèk dann télé, toute sak i ékri dann zournal konm in bann éspéstalis la finans mondyal. Toute lé bèl, toute lé vayan, toute lé roz, toute i marsh an boi karante.
Zot i kroi pa moin ? Mi san zot i kroi pa moin... é poitan, mi antann dir la Sosyété Zénéral lé paré pou ranbours gouvèrnman toute l’arzan la anprète ali. La pa aryink so bank-la, mé galman bannn gran bank dann l’Erop, dann l’Amérik, épi d’ote péi ankor. Normal ! La bours i romonte : toute sak i apèl "z’indis" lé dann vèr... é lo vèr lé dann frui ! Lo bon tann lontan la rotourné... I di mèm, toute bann bank la mète larzan par koté pou pèy bann "trédèr". Bann trédèr ? Kissa i lé sa ? Sa in bann moun lé péyé pou zoué la bours pou bann bank. Oplis z’ot zé i pèrmète ramas larzan, oplis la bank i gingn larzan, oplis bann trédèr i gingn in bon moné... I ashète bon marsé, i vann sèr, i ashète bon marshé, i vann shèr. Sé konm in késtyonn biznès, sof ké la, i koz pa in pti larzan, i koz koute milyar, vi k’i zoué pa rante ti-kolon, mé rant bann moun la ote.
Mon dalon la pa invante zèf bouyi, i di amoin li konpran pa koman i pé gingn tousa larzan aryink an zouan déssi la bours. Mé mon dalon la oubliy bann produi finansyé, in pé la mète an sirkilasyon, éspésyalman pou léspékilasyon. A bon ? I éspékil ankor konm l’otrozour ? Oui, é bann zournalis i di l’apré armète anlèr bann bul "éspékilativ", é kan bann bul-la va pété baya... Sé toute l’ékonomi mondyal va ésplozé.

Justin