Mésyé, médam, La sosyété, mi pé dir azot mi yèm pa in kozman konmsa. Poitan lé plito réjouissan di in n’afèr konmsa.La plui, sa i amenn in bon rékolt, sa i fé pouss zèrb pou zanimo, sa i donn demoun dolo pou boir. Donk lé pli préférab, li tonm pou toulmoun ké pa di tou, sansa ké li shoizi la tète. Lé vré ! lé bien vré ! Mé néna kékshoz i shifone amoin la dan ; souvan dé foi moin la antann demoun téi vé pa lité dir zafèr konmsa kissoi pa fé la grèv, kissoi pa vote pou la parti, kissoi bèss la tète dovan lotorité. Souvan défoi, moin la di k’i fo pa koz konmsa.I fo tout i donn la min pou la koz avansé. Mé téi ariv ké in pé téi manj avèk shakal épi téi plèr avèk lo gardien zanimo é sa sé in n’afèr i donn amoin doulèr dann kèr. Alé ! mi kite azot rofléshi la dsi é ni artrouv pli d’van ? Sipétadyé !