Lidé dominante ? Lidé dominante la plipar d’tan, sé in l’idé i sort dann out boush natirèlman kan la lang i koup dovan lo sèrvo, kan wi di sa bikanblan, kan wi kroi sa i vien dé ou, par out réfléksion, mé dann la réalité sé la sosyété k’ i dikt aou sa san ké wi konpran.

Par ébzanp kan wi parl bann jenn an dizan sa in bann délinkan : sé ou k’i di, pars la sosyété la fine rozist sa dsi out dik dir é wi panss lé natirèl dir in n’afèr konmsa.Poitan la pa natirèl ditou, é sa i obéi bann kode nout sosyété la fine mète dann la tète demoun ..

Dabor jenn ? Néna tout kalité ; sa la pa in klass sosyal é ki k’i di aou toutt lé délinkan ? Wi panss konmsa pars la sosyété la fine gangrène out léspri pou pran in n’afèr konmsa konm vérité d’lévanzil. Alé oir, non ! In lidé konmsa i vien dann out b oush épi kli sort dann lintéré bann dominèr la sosyété.

Mé zami, mwin la fine viv in bon koup de tan. Mi pé mèm dir azot mwin lé né dann in famiy toulmoun dann tan-la lété kominiss é mon vizyon la sosyété, mon bann valèr, mon bann prinsip mwin la trouv sa dann mon parti épi mon zoinal « Témoignages , zoinal défanss, bann san défans »-

Lé vré zordi ninport ki i pil nout bann prinsip avèk lo pyé.Ninport ki i pans lé pli fasil kraz lo pyé ké la tète, lé pli fasil malparl moun an ba ké moun an o. Lé pli fasil suiv lo kouran ké romonté, mèm si lo kouran i amenn anou dann bann rapid ni ansort ar pa.