Si mi tronp pa, Christian Estrosy lé minis lo Dévlpman Indistriyèl. Donkalor, li dovré trakass ali in pé pou lanploi dann lindistri... in n’afèr an pane vèy pa koman. Mé, nou na labitide, koméla, demoun, mèm si lé minis, plito ké fé zot travay, i profèr okip sak i rogarde pa zot, par l’fète mète zot kiyèr sal dann marmite i kui pa pou zot. La prèv, Estrosy l’apré sousyé in n’afèr k’i rogard minis l’Intèryèr... l’apré sokour lo gouvèrnman déssi so késtyonn la délinkans, déssi la késtyonn lo linsékirité.

Dèrnyé l’invansyon, li vé fé pèye in l’amann bann komine i fé pa sak i fo pou garanti la sékirité d’moun. Sa sé in n’afèr k’i tyinbo pa d’boute. Na poinn loi k’i di sa. Na poinn règléman k’i pèrmète in n’afèr konmsa. Mé par l’fète, akoz tousa dézord-la ? Akoz in pé la tète i travay dann vide ? Akoz mazine z’afèr i gingn ar pa zamé apliké ? Pétète, pars dann kouran moi d’oktob, i sava shanj gouvèrnman. L’èr-la, in pé i domann si zot va garde zot post minis. In pé i kalkil okip la plass z’ot kamarad. Kan minis l’Indistri i okip in n’afèr i intérèss minis l’Intèryèr, pétète ké li vé solman pran son plas.

Pandann tan-la, kabri i manz salade, bann pov i tir plizanplis lo dyab par la ké, lo bann promèss lo prézidan i kass par boute. Konm di lo kont, i fini an lo d’boudin. Sa i fé aryin, in pé i pran azot pou d’ote. Akoz pa pou lo prézidan ? Vi ké l’ot lé pa la koméla. Kan lo shat lé pa la, ra miské i dans !

Justin

NB : Estrosy ? Sa lo mèr la Vil Nice sa ! Figuir azot, i paré, konm la komine Tampon, li vé pa 20 pour san bann lojman sosyal dann son komine. Ala k’i mérite, in bon l’amann, touléka !