Oté

Kan listoir i bafouye par plass !

Justin / 28 novanm 2020

Mézami, kan bann moun konm Raymond Vergès , de Lépervanche et d’ot la désid domann in éstati départman pou bann vièye koloni, mi pans zot té kroi lé shoz téi sava éspass normalman, mé zot la gingn lo tan romark téi éspass pa konm zot l’avé dan l’idé. Départman pou zot lété pou komansé l’égalité sosyal épi la fin la sosyété kolonyal. ni koné lo tan légalité sosyal la mète pou ariv isi shé nou.Lo dézord kolonyal, li ossi la fini par disparète mé pa dann in tan normal malorozman..

Zordi Nout péi la Rényon lé konm ni koné : mé i rossann pa ankor sak bann nouvèl zénérasyon i souètré dizon franshman i pé pa di nout péi zordi lé dévlopé, mèm si li pouré ète dévlopé é si sa lété dann bann projé plizyèr zénérasyon.Nout sosyétéi mank pa défo é an partikilyé néna tro bann z’inégalité. ann sosyété kolonyal la poz la min dsi nou é rien a fèr pou fé lash azot la proi ; Pou la kiltir, la forasyon ann gouvèrnman la bien trène la zanm avan sède in pti pé. Déssèrtin i di mèm lo puissans kolonyal la fé sanblan délash in pé la kord pou myé séré é pou konsolide l’ord néo-kolonyal.

Mayotte son koté li osi li la réklam ète in départman.li la fini par gingn satisfaksyon é kan in bonpé d’moun téi kriy "Danzé !" zot la pa lèss inflians azot. Pou zot zot modèl té La rényon mé si zot téi o lo bann poin for, lo bann poin fèb téi éshape azot konplètman. zordi zot i anplègn lé shoz i sava pa assé vite pou zot, mé zot i ko npran pa La Rényon osi té dann in ka konmsa. é pou finir nout péi anou lé konm in kanar sink pate é moin néna konm l’inprésyon sé sak i atann Mayotte.

In légzanp : la povrété ! Iss La rényon, apré 76 zané départman, néna ankor 40% demoun pov. Zordi mi lir dann zoinal bann moun Mayotte i komanss ète désu kan zot i oi lé shoz i avanss pa konm i dovré.. Mi anparl sa konmsa, mé mi obliy pa La franss la vyole la loi pou sépar Mayotte par rapor lé z’ot zil komor ;Zordi banna lé angajé dann in shomin konm la n’ot é mi oi pa koman zot i sava trouv zot shomin galizé. Listoir i bafaouy parfoi !