Figuir azot avan yèr soir mi antann madam Girardin i sava fé in poin-la-press. Dann mon kèr mi di pétète èl i sava fé in poin dsi son métode é konm i di èl la shoizi lo shomin lo pli démokratik, bann zilé zone va asosyé avèk èl dann son konférans de press. Ala sak moin té i pans, é pou dir la vérité moin téi kroi.

Sof ké kan moin la vi kisa i lé lo bann délégué Sintandré, Sin-dni épi Sin Pyèr in pé partou, moin l’avé konm l’inprésyon bann la droite l’avé mète la min dsi lo mouvman épi i bann shèf lété roprézant shakinn in tandans la droite. Mi pé tronpé, mé an touléka sa téi poz amoin konm in poin l’intérogasyon.

Sof ké momandoné moin la antann madame la Ministrèz apré di dsi Rényon promyèr, kont pa dsi èl pou dévoil son propozisyon, pars èl i rézèrv sa pou anons dann son diskisyon avèk bann zilé zone... Mé in pé d’tan apré, mi antann aèl apré débite son plan sosyal-mèm plan moin l’avé déza antann néna ké somenn. Solman èl i di ala son bann mézir sosyal. Zot la konprann sa zot ? Si zot la konprann mi pé dir zot l for. Bann zilé zone la paf é roul azot dann la farine-la ?

Pou kosa mi di sa ? Pars, sanm pou moin la révolt té fine ariv tro for pou fé konmsi tout lété normal. Pou fé konmsi son bidzé lété a prann tèl ké li lété fine voté, pa késtyonn arfé in n’ot. Poitan PCR lété fine dir aèl vien vite La Rényon pars konm té in sityasion nouvèl téi fo fé in plan nouvo. El la pa fé sa, pars èl téi pans la sityasion lété apré gaté-pouri donk té i sifi d’atann. Atann kan lo frui sar pouri pou li tonbé..

Sa i fé pans amoin kékshoz : mi an souvien in zistoir moin la lir kan moin lété jenn . Bann demoun l’avé pandiy in boug dsi in bransh é té i atann solman li té i pète atèr. Zot téi i kriy, zot téi shant : « Kan lo frui lé mir i fo li tonm ! Kan lo frui lé mir i fo li tonm ».. . Mi vé dir par la lo gouvèrnman, sansa alor lo réjime kolonyal sansa lo boug i asiz laba palé l’élizé. Si i kontinyé konmsa, mi pans sa v’arivé.