Ni parl dopi lontan in réform l’ané skolèr mé ziska koméla réform-la la pankor gingn passé. Poitan lété pa si konpliké ké sa : i travaye kan i fé pa tro sho é i mète vakanss dann tan i fé tro sho - parèye pou siklone épi gro plui, i tonb galman dann la pèryode shalèr.

Fitintan déssèrtin téi propoz la klime dann toute klass mé té pa possib pars la prodikssyon léstréssité téi suiv pa, konm lo bidjé la komine, konsèye zénéral épi konsèye réjyonal. Alor kèl solission si ni konsidèr bande marmaye konm lo santre lo sistèm édikatif — é sirtou pa bande konjé administratif, osinonsa konjé pou lo pèrsonèl lédikassion nassyonal.

Ni koné lo bati skolèr dan lé ba lé pa étidyé pou fé bèss la tanpératir é bande marmaye la plipar d’tan lé konm dan in four. Mé néna vantilatèr é sof mon réspé la plipar d’tan vantilatèr i brass lèr sho é lo kor lé tro okipé pou rézist lo fé sho pou la tète bien travaye.

A ! Laba dann l’Almagn néna lo ferienhitze - vakanss pou la shalèr - mé in zour rantrantr sé in kékshoz possib mé si i fé sho somenn an somenn, moi an moi, dopi séktanb ziska déssanm épi dopi zanvyé ziska la fin moi d’mars koman i fé ? I gingn pa fé anfinnkonte. Lé oblijé pass par la réform l’ané skolèr. Mé sa la pa non pli in solission éfikass san pour san.

Alor sé lo bati skolèr k’i fo amélyoré. Sé la vantilassion k’i fo rovoir... Mwin pèrsonèl kan mwin téi sava lékol l’aprémidi dann la sézon fé sho, souvan défoi mwin l’avé tro somèye pou travaye é biento kan va fé karante dégré (mèm sinkante) mi oi pa koman marmaye va gingn suiv lo mètr é koman lo mètr li ossi va gingn suiv lo program.

Alor mézami i fo in plan d’irzanss é l’éta plito ké raz la pinte lo bidzé lédikassion nassyonal li fré myé d’ède bande zékol, bande kolèj épi bande lissé pou fé fass in sityassion konm sak i sava arivé é sirtou ké zot i di pa : « i fé fré an franss donk i fé fré partou ! ». Issi lé pa konmsa ditou.

A bon antandèr, salu !

Justin