Matant Zélida la ékrir Justin :

Mon shèr nové, mon spès salté, rouj-de-fon dovan l’étèrnité, mi pans zordi ou i doi z’ète an pétar pars mésyé Didier la pass ankor in kou é avèk pliské sinkant pour san bann voi. Vi domann aou pou koi, m’a dir aou riyink in n’afèr : rogard aou bien an fas épi dmann aou bien si ou lé pa pou kékshoz la-dan ! Touléka, si zot, sak i apèl la gosh épi lo sant zot la pa pou kékshoz dann lo bat-lavé zot la gagné sa i vé dir mi konfonn otour avèk alantour. Tok ! Pran sa pou toué !

Justin la fé pou répons :

Mon vyé matant k’i koz arienk la boush rouvèr, dizon ou la pa kas lo kat pat in kanar kan ou i di in n’afèr konmsa. Sak la pèrd lé touzour pou kékshoz é la pa bézoin fé pityé pou sa-i apèl sa lo viktimizasyon : nana in pé lé for pou sa isi !- mé, konm ou i koné i ansèrv de riyin bar la mèr avèk in boushonn paye. Mi sava pa rofé l’istoir mé zis in pti mo pou gouvèrnman sosyalis : la pa li mèm la apiy mésyé Didier pou la NRL ? La pa li mèm la rofiz lo l’éspèrtiz finansyé, la donn lo droi pou pa réspèk la natir rényoné. Alor, lé pa étonan banna la dans dsi nout vant… L’èr-la lé pa itil parl amoin la gosh, la droit La Frans, pars inn konm l’ot la mète anou dann malizé. La pa bézoin fèr konmsi Holland lété pou nou, alé oir li, konm lé zot la fé tout pou mète anou dann l’anboulkidi. Aprésa, nou l’avé lo la dann kou é téi fo solman ral dosi. Tok, pran sa pou ou !

NB L’èrla mi pans in bon kamarad i téléfone amoin pou astik amoin par raport sak mi ékri. Mi di ali, i fo bien fé lo tour tout lo bann problèm pou trouv tout lo bann rézon lo batlavé. Ni pé pa kashyète anou déyèr nout ti-doi. Lé bien vré !