Na dé-troi zour d’sa, Jorge Semprun lé mor. Li l’avé katrovin sète an : in vi bien ranpli konm rézistan, déporté dann kan par bann z’Alman, onm politik, épi ékrivin, minis mèm in koup de tan...
Kan la guèr sivil i pète dan l’Espagn, son famiy i pran shomin l’égzil, i sava dan la France, dan la Suisse, dann Pays-Bas, épi i artourn dan la France. Jorge Semprun i étidyé la filozofi, l’istoir dan l’iniversité La Sorbonne. Kan la guèr trantnèf-karantsink i pète, kan bann nazi i karsèr la France, li rant dan la rézistans épi li pran son kart dann parti kominis éspagnol. L’ané 1943, la Gestapo i arète ali épi i anvoy ali dann Buchenwald, in kan konsantrasyon dan l’Almagn. Li pass kinz moi dann kan-la.
Kan bann z’alyé la dégome l’Almagn nazi, i libèr bann prizonyé, é li rotourn dan la France, vi ké dan son péi l’Espagne, nana la diktatir Zénéral Franco. Mé li arèt pa milité pou sèy libèr son péi. Dann tan-la, li na son kart parti kominis éspagnol, é li tyinbo in gran rol la-dan. Mé in zour, li lé pi dakor avèk son parti, zot i sépar. L’èr-la, li komans in karyèr konm ékrivin, sinéast, li ékri listoir d’moun épi in bon pé roman. Li gingn plizyèr pri.
An plis son parkour avèk bann parti kominis l’Espagne épi la France, li la bègn tout son vi dan bann z’idé kominis... sa lété inportan pou li. Sé pou sa kan bann gran télé épi bann gran radyo la anons son mor, zot la pa oubli son parkour konm kominis. Toute ? Mé pa bann télé La Rényon pars, ankor zordi, lo mo "kominis" i korsh la boush déssèrtin.

NB : L’ané 1969, avèk “La deuxième mort de Ramon Mercader” li gingn lo Pri Femina.

Justin