Zédi, moin la lir dann zournal in sondaz déssi lo kréol rényoné. Pou in bon nouvèl, sé in bon nouvèl, pou tout sak i èm lo kréol, La Rényon épi lo pèp rényoné. Pou bann kolonyalis, dann z’ot fonnkèr, sirman la pa in bon nouvèl.

Antann dir soisante-é-in pour san dmoun lé dakor pou k’ le kréol i rant dann lékol, soisann-katorz pour san i pans le kréol sé in lang, sa sé in bon nouvèl pou in bonpé, i doi ète in éskandal pou d’ot ! Mi an souvyin mèm in ministrèz la di : parlé kréol-la, sa in patoi sinpatik ! Mé pétète, zordi èl la fine shanj lopinyon.

Aprann katrovin-dis pour san d’moun i kalkil bilinguism fransé-kréol sé in rishès pou bann marmay é katrovin-dis pour san i souète k’i amontr la kiltir épi listoir La Rényon dann bann kolèz épi bann lisé... sa lé bon pou in mazorité d’moun, é sé in malédiksyon pou bann maloki, kaziman lé sète plé Légypt.

Solman dann z’ot fonn-trip, zot i doi domann azot in pé kossa k’i ariv bann Rényoné avèk le kréol. Konm in pé la pilone sa, la kritik sa, la kraz sa, la kaziman intèrdi sa dann lékol, épi sa i bouz ankor !... Koman l’amour la lang kréol épi la kiltir, koman lo santiman k’i fo pa lès sa tonbé konm in vyé shosète la nyabou fé son shemin konm li la fé.

O fon, pétète bann kolonyalis, bann maloki, bann gro-jabo i pans lo pèp na tor é zot na rézon. Donkalor, konm di lo kont, in sèl solissyon : i fo shanj lo pèp… !

Justin