Nou lé dann in sosyété diskriminasyon. Pa in diskriminasyon par la koulèr ! Pa non pli indiskriminasyon suivan lo sèks : é ankor, sé in n’afèr i rèss a oir ! Mé sirman in sosyété diskriminasyon rant rish épi pov. Si in pov i travaye pa, li lé parèss é li sava pa rode travaye. Lo rish kant a li, travaye i vien shèrch ali son kaz é an proporsyonn son rishès. Kan in rish I fé la frode fiscal, lé normal l’éta I fé pèye tro zinpo. Kan in pov I travaye o noir pou dé grin, li mète dann danzé la sosyété. Parl pi la zistis pars konm Lafontaine té i ékri : suivan ou sar rish sansa o flan, la zistis va fé oaou blan sansa noir. Alé ! Mi kite azot rofléshi la dsi é ni artrouv pli d’van . Sipétadyé !