Apèl ali la rak, pétrol, lèv tèt, barbo, koudsèk. Sansa lo ronm pir ou bien aranzé, vié ou bien nèv. Donn ali lo nom l’éspri kann... Mète ali sanm sitron, siro, pipèrmin, gouyavié. Anval ali ti-dousman, sansa kal ali in kou sèk, in kou mèm. Kisoi lalkol péi, kisoi lalkol déor... lé rogrétan a dir, li fé pa nou arienk lo bien, souvan dé foi, li fé anou d’tor...
Dann tout kartié, moin lé pliské sir, i pé antann zistoir in boug la paryé li boir in lit la rak in sèl kou : li la boir pou vréman, mé li la rant dann koma épi z’apré, li la parti oir zézi, sansa grandyab. Mé san alé ziské-la, konbien la fé fèr z’aksidan, batay demoun inn-sanm l’ot, koz initil, mète zirman dan la boush demoun bien édiké. Rish ou bien mizèr, zènn ou bien vié galé, zonm konm fanm, lalkol i amènn pa nou dann shomin galizé, lé riskab amènn a nou plito dann malizé. Nou lé mèm riskab mank demoun réspé !
Mé ala pa k’minis la Santé, Roselyne Bachelot, i di partou, èl va lès vant lalkol déssi intèrnèt... fé la pib parl’fèt. A ! A ! Lé pa bon sa madam ! Lé pa bon ditou, akoz lé riskab ankouraz bann zènn boir an goulipia*, sa i fo pa...
Mi éspèr, touléka, èl i gingn ar pa fé in kékshoz konmsa... Zot i koné kozman Madoré, kan li téi shant « kan lo ronm lé dann boutèy, li bouz pa vréman, mé kan li la rant anndan, li la pi parèy ! », sa lé vré pou vréman, sa ! Tansion pangar madam lo minis !

* goulipia sansa goulapia : sa i vé dir voras, gourman.

Justin