Matante Zélida la ékrir Justin :
Mon shèr nové, té i fo mi di aou in n’afèr konm sa, akoz pou moin, kan bann rouj de fon nana in zékli d’pouvoir, kan sré t’i in pti guine-guine, z’ot shoviy i gonf. Oté ! Mon mèr - sak la pèrd zéléksion-là - la fé in rénion, la kraz azot, la kraz azot. Mon bann kamarad té plié an dé pou rir. Oté, mazine in pé banna i vé rouv in konpagni bato pou transport marshandiz rant Madégaskar-Maurice épi La Rénion. Pou konplète lo tablo, zot i vé mète voil an plis ké lo motèr déssi lo bato. Kan la tokézon i anklav la tète in moun-la ? I anklav pa pou zoué !

Justin la fé aèl pou répons :
Mon vié matante, alor shak foi nana in n’afèr d’bien, pou ou lé pa bien. I sifi k’lo lansien mèr i di in n’afèr, i fo ou i kroi. Poitan, in konpagni bato, sé in bon n’afèr, konmsa lé z’ot konpagni bato va arète pèz déssi nou konmsa, épi zot shantaj déssi la késtionn’pri i pas ar pi. Épi, si i mète la voil an plis ké lo motèr, nora moiyin konomiz in tièr lo karbiran k’i dépans ; épi in tièr karbiran, sa i fé in takon larzan sa !
Alor sé in bon lidé, konm lo ko-dévlopman rant bann péi l’oséan indien, sé galman in bon l’idé ; ké ou i kroi, ké ou i kroi pa. Kan lo saz i amontr la line, lo moun kouyon i agard lo doi !

Justin