Mésyé, Médam, La sosyété, koz èk moin sé koz avèk in kouyon-o pyé d’lo mir i oi lo mason. Mi koné pa si zot la fini antann kozman moin la mark an-o la. Sa in kozman i sort l’Afrik é kosa li vé dir pou d’bon ? Biensir pèrsone i koné pa manyèr pansé in shate kan li la pa fain. Mé pé sfèr son pansé lé in pé konm sèk moin la mark an-o la. Mi rapèl néna poin lontan moin téi anparl in ronard apré ésèye trap rézin é momandoné konm li gngn pa trap lo rézin ala ké li di : « Bann rézin-la lé tro vèr é lé bon arienk pou bann goulipya ! ». Pou moin in shate la pa fain, li osi, li pé koz konmsa. Li osi li pé anvoye fèr fout bann grap rézin.É nou bann zom épi bann fam modèrn é nou bann omo sapiens ? Zot i pans pa nou osi nou lé riskab an avoir bann rofléksyon konmsa ? Zot i pans pa nou osi ni pé krétik in manzé ni trouv la pa bon. Final de kont nou lé pa pli for ké lo shate,, lo ronar épi tout kalité zanimo dovan in réalité ki shap avèk li. Alé ! M’a dir azot, nou osi nou lé konmsa é nou lé pa pli for ké bann zanimo néna dann la natir. Alé ! mi kite azot rofléshi la dsi éni artrouv pli d’van. Sipétadyé !