Mésyé zé Médam, la sosysété, koz èk moin sé koz èk in kouyon mé sé o pyé d’lo mir k’I oi lo mason. Mézami, finalman, lé shoz lé konmsa : lo moun I marsh avèk l’anvi sansa li marsh pa. Mi rapèl dann in éstaz formasyon lo formatris téi linspétris é èl la di plizyèr foi avèk nou anparmlan bann zanfan La rényon :”Kan I n b ourik la pa soif I ansèrv de rien done ali pou boir.” Son kozman téi fé sort amoin d’mé gon si tèlman k’in zour moin la gingn toupé pou dir aèl : « Madam, mi pé asir aou mi dira pa bann zanfan kréol kalité kozman konmsa, pars la pa zot fote si l’amontrèr lé nil. » Sé konmsa la fé mont amoin dann biro diréktèr é sète-la la gard amoin l’èr méprizan. Sol rogré moin néna sé ké moin la pa kol sa épi lo madam, shakinn in bon masstapin bien anvoyé… Nora paf é avans lé shoz mé nora tir amoin in poi dsi lo kèr.. Alé ! Mi kite azot rofléshi la dsi é ni artrouv pli d’van. Sipétadyé.