Lé vré in sèrtin Prézidan Macron la okipe de sa, la propoz in métode pou in rokonstrikssion rapide… In pé suivan la métode notre Dame de Paris téi doi rofé an in an, épi la prann sinkan san finir san pour san. Antouléka la métode lété a popré lo mèm : fèr in tablisman avèk konm shèf in jénéral épi fé pass toute bann zakssion par lintèrmédyèr lo tablisman-la. San ké lé z’ot zaktèr i aksèpe pass la min.
Mwin k’i koné pa Mayotte, mi antann pa bann témoignaz dsi la réissite, mé mi antann épi mi lir arienk bann témoignaz dsi la déssépssion bann demoune laba kissoi la késtyonn lopital, kissoi la késtyonn lo, kissoi la késtyonn la rokonstrikssion lo trant-troi mil kaz siklone la mète atèr. In pé pli sordide mi antan pa in mizopoin dsi lo nonm demoune lé mor dann siklone Shido.
Mèm sa gouvèrnman i gingn pa dir… si i fo konte par dizène, par santène, sansa par milyé, sansa ankor par dizène de mille. An fète pou ma par mwin na linpréssyon mwin lé konm dovan in sogré d’éta…I fo dir la fé in bon boute tan in politik déstrikssion bann bidonvil, konm in kontropoi pou lo problèm la sékirité konm in politik pou élimine demoune soi-dizan étranj.
Astèr i fo mi rovien dsi la késtyon désalman lo d’mèr avèk lo métode lo pli pir pou lanvironeman avèk lo rojé la somir dann lagon olèrk fèr sak bann shinoi i koné fèr : in désalman lo d’mèr, avèk la prodikssiond’lo potab, sète lidrojène vèr épi lékstrakssion bann métal dann la somir.
Mi koné pa kossa la ministress l’outre-mèr i panss de sa, ni lo gouvèrnman, ni lo Prézidan mé pèrsonèlman mi oi sa konm in bonm-rotardman pou la natir.
A bon antandèr salu !
Nb
Ni pé dir kant mèm pandann tan-la kabri i manz salade é bann maoré konm Sœur Anne i oi pa arien vnir. Koz ék fèr sé dë, sa lé sir.

Justin