Matante Zélida la ékrir Justin :
Mon shèr nové, mon spès salté !
Mi pans nou lé déssi la tèr pou boir, pou manzé, pou amènn in vi korèk avèk in pti plézir tazantan. Vyé konm zènn, gosh konm droit, mèm bann rouz de fon, i fo zot i konpran la vi konmsa !
Donk, lo vré késtyon, la pa in késtyonn travay. Sé in késtyonn an avoir sakifo pou viv konm nou la di an-o la.
Alors, mi konpran pa pou kosa zot, zot i vé absoliman demoun i travay. Bou di kont, zot i okip dé shoz k’i rogard pa zot pou vréman… !

Justin la fé aèl pou répons :
Mon vyé matante, si ou i pran la pènn ékout la radyo, ou i doi antann in pé dmoun apré malparl bann R.M.I., bann fam sèl, mèm bann andikap... Pou déssèrtin, bann na poin travay lé parès konm lo shyin é i fé pa moindroman in l’éfor pou gingn kansréti in pti boulo.
Matant, in moun lé pa solman in tib dizéstif, li la pa bézoin manzé solman : li vé demoun nana la konsidérasyon pou li, i réspèk son dignité. Épi li vé osi l’égalité.
Sak mi sort dir aou-la, i sifi pou ou konprann pou kosa ni vé shak moun lé an kapasité an avoir, nana in travay, in l’anploi, mèm in pti boulo pou komansé... Konm séga lontan té i shant : kan mèm pa bokou, in pti morso… !

Justin